Wisigasira igitugu cy’inkotanyi kandi wishyigikira ko gisimbuzwa ikindi gitugu!

Umurimo wo gushyira ahagaragara ibyaha ndengakamere byakorewe abanyarwanda mu bihe byashize n’ibibakorerwa ubu, uwo kubyamagana n’uwo gushakira ubutabera abo byibasiye ni ingenzi mu kubaka u Rwanda rushya rugendera ku mategeko akwiye kandi rwubahiriza uburenganzira bwa bose. Cyakora, bigaragara ko uwo murimo ubwawo utihagije kubera ko ubutegetsi bwakabaye ari bwo bwiyambazwa ngo butabare abibasiwe kandi buhe ubutabera ababusaba ni bwo ubwabwo bwakoze kandi bugikora ibyo byaha. Hakenewe ihinduramitegekere.

Guhirimbanira iyubahirizwa ry’uburenganzira bwa kiremwamuntu mu gihugu kiyobowe mu buryo bw’igitugu utabijyanishije no guharanira amahinduka meza yo mu rwego rwa politiki ni nko kubiba mu murima utarateguriwe kwakira imbuto. Nanone, byagereranywa no gukora ikizamini maze, aho gusigira mwalimu urupapuro wasubirijeho ngo arushyireho amanota, ahubwo ukarucyura imuhira wizeye kuzabona izina ryawe kuri lisiti y’abatsinze icyo kizamini. Ku rundi ruhande, gukora politiki idaha umwanya ibyo kuganira ku bibazo byose bijyanye n’ihohoterwa ry’uburenganzira bwa kiremwamuntu ryakozwe cyangwa rikorwa n’ubutegetsi uharanira gusimbura ni nko kwitabira ikizamini maze ugasigira mwalimu urupapuro utagize ikintu na kimwe wandikaho, witeze ko arushyiraho amanota yatuma izina ryawe rizagaragara ku rutonde rw’abatsinze icyo kizamini.

Guharanira iyubahirizwa ry’uburenganzira bwa kiremwamuntu mu gihugu nk’u Rwanda rwa none utari umwe mu bagize opozisiyo ndetse utari mu bayishyigikira ni ibintu bibereye abikundira ubutegetsi buriho babikorera kubuhwitura no kubutungira agatoki ahakwiye impinduka, bagendeye ku kuba bazi ko gukora ibiri mu nyungu za rubanda bibusigasira bikabukomeza. Bibereye nanone ababikorera kubivanamo indonke baba batinya ko batakaza icyo barishaga igihe igihugu cyaba kibonye ubutegetsi bushya buteza imbere demokarasi n’imiyoborere myiza. Ku rundi ruhande, kugira uruhare muri opozisiyo idashaka ko ihohoterwa ryakorewe abanyarwanda n’iribakorerwa ubu rivugwaho (ndetse idashaka ko uburyo bwo kurihagarika no guha ubutabera abo ryibasiye buganirwaho) ni ibintu bibereye gusa abanyapolitiki baharanira gusimbuza igitugu ikindi. Bene abo, kubera ko ubutegetsi baba bifuza gushyiraho ari ubutazahaumwanya ukwiye umuco wo kujora ubutegetsi n’uwo kwamagana amabi yabwo, bagendera kure inzira y’ibiganiro bitagira ingingo bihigika. Ubu buryo bwombi bw’imikorere y’abatari bake mu bavuga ko bifuza impinduka nziza mu Rwanda buhabanye n’inyungu rusange. Ntacyo bwungura imbaga y’abanyarwanda basonzeye demokarasi, ubutabera n’iyubahirizwa ry’uburenganzira bwa muntu. Ibiri amambu, bufasha ubutegetsi bw’ishyaka fpr inkotanyi kubuza opozisiyo nyakuri kujya mbere.

Koko rero, opozisiyo izabonera ibisubizo ibibazo byo mu rwego rwa politiki byugarije umuryango nyarwanda muri iki gihe ni iyiyubaka nk’iyitegura gusimbura mu nshigano zose ubutegetsi buriho, hakubiyemo n’izijyanye no gutanga ubutabera no kubahiriza uburenganzira bwa muntu. Ni opozisiyo ishyiraho cyangwa ishyigikira urubuga abantu bashobora kuganiriramo mu bwisanzure busesuye ku ngingo iyo ari yo yose ifite aho ihuriye n’ineza y’abanyarwanda bose nta vangura. Ku rundi ruhande, uguhirimbanira iyubahirizwa ry’uburengazira bwa muntu gukenewe cyane muri iki gihe ni ukudahagararira ku byo kwamagana amabi y’ubutegetsi buriho, ahubwo kukagira n’uruhare rutaziguye mu guharanira amahinduka meza yo mu rwego rwa politiki.

Mu yandi magambo, opozisiyo itanga icyizere kuri bose ni iharanira inyungu rusange z’abanyarwanda bose nta vangura kandi ishyira imbere ibijyanye n’iyubahiriza ry’uburenzagira bwa muntu. Ku rundi ruhande, guharanira ko u Rwanda ruba igihugu kigendera ku mategeko bya nyabyo cyubahiriza uburenganzira bwa bose nta vangura ni ibikozwe hazirikanwa ko uburenganzira bwa muntu bwubahirizwa ku rugero rukwiye iyo igihugu gifite imiyoborere myiza. Uko kudasigasira igitugu cy’inkotanyi no kudashyigikira ko gisimbuzwa ikindi gitugu ni yo fondasiyo y’ihinduramitegekere ryifuzwa na benshi, riha uburenganzira bwa muntu umwanya ukwiye.

--------------------------------------------------------------------------------------------------------------------------

  

Ubushishozi ni bwo butwari. Ibindi ni amahirwe!

Kuva ishyaka fpr inkotanyi ryagera ku butegetsi, benshi mu bazi amabi yaryo bakomeje guhanga amaso abaryamaganira ku mugaragaro bari mu Rwanda uko bagiye basimburana. Buri uko hagize umwe mu bategetsi, umunyamakuru, umuhanzi cyangwa umuturage usanzwe utobora akavuga ibidashimisha amatwi y’ubutegetsi bwaryo na buri uko habaga habayeho utavuga rumwe na bwo witabiriye amatora cyangwa uhihibikanira gushinga ishyaka rishya, byagiye bishitura abatari bacye. Babaga biteze ko uko kuritinyuka gushobora guhagurutsa rubanda bigafungura akadirishya demokarasi ishobora kwinjiriramo.

Ikibabaje ni uko, kugeza ubu, hafi ya bose mu batinyutse guhangara ishyaka fpr inkotanyi bari mu Rwanda ari abagiye babikora mu buryo bwa nyakamwe. Mu yandi magambo, nta n’umwe mu batavuga rumwe na ryo bahisemo inzira y’amahoro washoboye guhagurukana n’abandi ku bwinshi ngo aryamagane ahuje na bo amajwi. Nta n’umwe kandi muri bo washoboye kwisuganyiriza hamwe n’abandi mu itsinda yunguraniramo na bo ibitekerezo ku cyerekezo cya politiki bakwiye guha igihugu cy’u Rwanda. Ababigerageje (baba ababikorana umutima utaryarya cyangwa ababikora babisabwe n’ishyaka fpr inkotanyi ubwaryo ribakinisha iryo kinamico ritindi rigamije gukururira mu rushundura abatarikunda bifuza ubutegetsi butari ubwaryo) bahigwa bukware maze abafashwe bakicwa, bakaburirwa irengero cyangwa bagakoreshwa akarasisi mu mapingu hagamijwe gutera ubwoba abasigaye. Ibyo kwigaragambiriza hamwe n’abandi, haba mu mihanda cyangwa imbere y’inyubako z’ubwo butegetsi n’iz’ishyaka ribuyoboye, bagamije kwerekanira ku mugaragaro urugero bagezamo barwifuzamo amaza ya demokarasi, usibye no kuba ntawashoboye kubishyira mu ngiro, no kubikomozaho mu mvugo byakozwe na mbarwa.

Umwaka wa 2015 wonyine wagombye kuba warasize bigaragariye bose ko abanyarwanda bahebye ijabo n’ijambo. Ubonye koko ngo ishyaka ryangwa na rubanda aka kageni ribe ryarashoboye guhindura itegeko-nshinga kugirango umukandida waryo yemererwe umubare wa manda zirenze izo yemererwaga kugeza icyo gihe maze ntibihagurutse imbaga! Opozisiyo ijya mbere ni iyita kuri ibi bihamya by’ibihe, igahanga inzira idapimiranya kandi ititega ibitariho.

Kwamagana ubutegetsi uri ku butaka bugenzurwa na bwo bisaba gutinyuka ku rugero rugenwa n’ubukare bw’igitugu cyabwo abaturage barwo bahanganye na cyo. Ni ukuvuga ko ubucye bw’abagiye batinyuka kwamagana mu bihe binyuranye ishyaka fpr inkotanyi bari mu Rwanda (ndetse uko bigaragara biganjemo abahagurukirizwa na ryo kuyobya abanyurwa manuma) bikwiye gufatwa nk’ikimenyetso cy’uko igitugu cyaryo gikaze bitagira akagero. Bityo, aho kuba byatinyura rubanda cyangwa ngo bibe byaba imbarutso y’impinduramitegekere yifuzwa na benshi, kwirekura umwe umwe badahagurukanye n’abandi bishyira abatinyuka kuryamaganira ku butaka rigenzura mu kaga ko gutoragurwa umwe ku wundi n’inzego z’umutekano w’ubutegetsi bwaryo; akenshi ibyo bikababaho bamaze gukoreshwa na zo, babizi cyangwa batabizi, mu kugusha abandi b’imitima itaryaraya mu mutego w’abo bicanyi.

Ku rundi ruhande, urugero umuntu agezamo atinyuka ibyo abandi batinye rugenwa n’urugero agezamo abona ibyisobye abandi (akitwa « intwari ») cyangwa rukagenwa n’urugero agezamo adashishoza nk’abandi (akitwa « umwiyahuzi » utabigambiriye). Ni koko, imbimbuzi zidafite amakuru ahagije kimwe n’izishyuhaguzwa zirekura imburagihe zikagwa mu ruzi zirwita ikiziba. Birimo irihe somo? Ubushishozi ni bwo bubashisha impirimbanyi kumenya igihe cyo kugungira, icyo gusatira n’icyo gukizwa n’amaguru. Aho ubushishozi butari, gutinyuka kubyara ubwiyahuzi kandi konona nk’ubwoba ubwabwo. Ni koko, ubushishozi ni bwo butwari. Ibindi ni amahirwe!

--------------------------------------------------------------------------------------------------------------------------